ဦးအေးချမ်း (UAC) သည် ဘဝတစ်လျှောက်လုံးတွင်  ပညာလေ့လာဆည်းပူးသူ၊ ပညာဖြန့်ဖြူပေးသူ၊  မီဒီယာပညာရပ်ဖြင့် ဦးဆောင်မှုပေးသူ တစ်ဦးအနေဖြင့် ပြည်သူလူထု၏ တာဝန်ကို ထမ်းရွက်လိုသူ တစ်ဦးဖြစ်ပြီး စစ်မှန်သော အပြောင်းအလဲ ဟူသည် ရိုးသား၍ သမာသမတ်ရှိသော ခေါင်းဆောင်မှုနှင့် အသိပညာရှိသော ပြည်သူလူထုထံမှ  စတင်ရမည်ဖြစ်ကြောင်း ယုံကြည်သူ တစ်ဦးဖြစ်ပါသည်။

ရန်ကုန်မြို့တွင် မွေးဖွားကြီးပြင်းလာသူ ဦးအေးချမ်း၏ ဘဝခရီးသည် အလွန်ရိုးရှင်းသည့်  မိသားစုဘဝခရီးမှ  စတင်ကာ စင်ကာပူ၊ ယူနိုက်တက်ကင်းဒမ်းနှင့် တရုတ်နိုင်ငံတို့တွင် နိုင်ငံတကာပညာရေးနှင့် ပရော်ဖက်ရှင်နယ် အောင်မြင်မှုများကို  ရယူခဲ့သူလည်း ဖြစ်ပါသည်။ 

ပညာရေးအနေဖြင့် သူသည် Chartered Accountant တစ်ဦးဖြစ်ပြီး နောက်ပိုင်းတွင် စင်ကာပူရှိ Nanyang Technological University မှ MBA ဘွဲ့ရရှိခဲ့ကာ ပေကင်းတက္ကသိုလ်တွင် Dongfang Scholar အဖြစ် ဆက်လက်လေ့လာခဲ့ပြီး နိုင်ငံတကာ အခွင့်အလမ်းများစွာ  ရှိခဲ့သော်လည်း သူ၏ အလေးထားမှုနှင့် တာဝန်ယူမှုသည် မြန်မာနိုင်ငံအပေါ် အမြဲတမ်း ခိုင်မာစွာ ထားရှိခဲ့သူ ဖြစ်ပါသည်။ 

ဦးအေးချမ်းသည် ဘဏ္ဍာရေးပညာကို လူငယ်များအား နှစ်ပေါင်းများစွာ သင်ကြားပေးသည့် ပညာရှင်တစ်ဦးအဖြစ်လည်းကောင်း၊ သတင်းအမှားများကို တုံ့ပြန်ထိန်းချုပ်သည့် စစ်မှန်သော သတင်းများကို ချပြနိုင်သည့် မီဒီယာလုပ်ငန်းရှင်တစ်ဦးအဖြစ် လည်းကောင်း၊ နိုင်ငံတကာ စီးပွားရေးနှင့် နိုင်ငံတကာရေးရာအပေါ် သုံးသပ်ရှုမြင်သည့် ဆောင်းပါးရေးသားသူနှင့် နိုင်ငံတော်အဆင့်ရုပ်မြင်သံကြားတွင် သုံးသပ်သူ အဖြစ်လည်းကောင်း၊ မြန်မာနိုင်ငံ၏ ဒစ်ဂျစ်တယ်နှင့် အီလက်ထရွန်းနစ် ကုန်သွယ်ရေး ဖွံ့ဖြိုးတိုးတက်မှုအတွက် အရေးပါသော ဥပဒေများနှင့် စည်းမျဉ်းစည်းကမ်းများ ပါဝင်ရေးဆွဲပံ့ပိုးသူ အဖြစ်လည်းကောင်း နိုင်ငံတော်အတွက် တာဝန်များကို  ဆောင်ရွက်ခဲ့သူ ဖြစ်ပါသည်။ ယင်းအပြင် ကုလသမဂ္ဂအပါအဝင် နိုင်ငံတကာဖိုရမ်များတွင် နိုင်ငံ့ကိုယ်စားပြု ပါဝင်ခဲ့ပြီး မြန်မာ့မီဒီယာကောင်စီကဲ့သို့ အမျိုးသားအဆင့် အဖွဲ့အစည်းများကိုလည်း ဦးဆောင်ခဲ့သူ ဖြစ်ပါသည်။ 

ဦးအေးချမ်းသည် အစိုးရအဖွဲ့အစည်းများနှင့် နီးကပ်စွာ လုပ်ကိုင်ဆောင်ရွက်ရင်း နေ့စဉ်ဘဝအတွင်း ပြည်သူများ ကြုံတွေ့နေရသည့် အခက်အခဲများကို ကိုယ်တိုင်မြင်တွေ့လာပြီးနောက် ပြည်သူလူထု၏ ဘဝအခက်အခဲများကို တစ်နည်းတစ်လမ်းဖြင့် ဖြေရှင်းပေးနိုင်ရန် ဦးအေးချမ်းသည် အရေးပါသော ဆုံးဖြတ်ချက်တစ်ရပ်ကို ချမှတ်ခဲ့သည်။ 

ယင်းဆုံးဖြတ်ချက်မှာ ၂၀၂၅ ခုနှစ် ရွေးကောက်ပွဲတွင် လှိုင်သာယာမြို့နယ်ကို ကိုယ်စားပြု၍ ပြည်သူ့လွှတ်တော် အမတ်အဖြစ် ဝင်ရောက်ယှဉ်ပြိုင်ရန် ဖြစ်ပါသည်။ 

သူ၏ ရည်မှန်းချက်မှာ လွန်စွာ ရိုးရှင်းပြီး မှန်ကန်ဖြူစင်သည့် စိတ်ရင်းစေတနာဖြင့် ပြည်သူ့အခက်အခဲကို  နားထောင်ရန်၊ ပြည်သူများနှင့် လက်တွဲချိတ်ဆက်ရန်နှင့် မြန်မာနိုင်ငံ၏ အနာဂတ်အပေါ် နက်ရှိုင်းစွာ ယုံကြည်ထားသော စိတ်ဓာတ်ဖြင့် သမာသမတ်ကျမှု၊ စွမ်းရည်ပြည့်ဝမှုတို့နှင့်အတူ ပြည်သူများကို ဝန်ဆောင်မှုပေးရန် ဖြစ်ပါသည်။

The future is bright.

The future is green.