ငယ်ဘဝ

ဦးအေးချမ်း (ငယ်နာမည် – ကိုဆန်း) သည် ၁၉၇၃ ခုနှစ် အနှောင်းပိုင်းတွင် မွေးဖွားခဲ့သည်။ ကိုဆန်းကို မွေးဖွားချိန်တွင် အေးချမ်းသည့် မိုးရာသီနှင့် အေးမြသည့် ဆောင်းရာသီတို့  ဆုံဆည်းနေသည့် ကာလဖြစ်သဖြင့် “အေးချမ်း” ဟူသည့် အမည်ကို မိဘများက ပေးခဲ့ခြင်းဖြစ်ပါသည်။ အေးချမ်း ဟူသော အမည်သည်  အဓိပ္ပါယ်အားဖြင့် အေးမြသည့်အအေးဓာတ်ရှိခြင်းနှင့် ငြိမ်းချမ်းသည့် ဘဝကို ဆိုလိုသကဲ့သို့ အနက်အဓိပ္ပါယ်အရလည်း တည်ငြိမ်အေးချမ်းမှုကို ဖော်ပြခြင်းပင် ဖြစ်ပါသည်။ 

သူ၏ ဖခင်မှာ တပ်မတော်သားရေတပ်ဝန်ထမ်းတစ်ဦးဖြစ်ပြီး မိခင်မှာ ကျောင်းဆရာမတစ်ဦး ဖြစ်ကာ မိဘနှစ်ပါးစလုံးမှာ  လုပ်ငန်း တာဝန်များကို ဦးစားပေးကာ   ထမ်းရွက်ကြသူများ ဖြစ်သဖြင့် ကိုဆန်း၏ ငယ်ဘဝများသည် မိဘနှစ်ပါးနှင့်  အတူနေရခြင်းထက် အဘိုးအဘွားများနှင့် ညီအစ်ကိုမောင်နှမဝမ်းကွဲများနှင့်အတူ အများဆုံး ဖြတ်သန်းခဲ့ရပါသည်။ 

ကိုဆန်းသည် မောင်နှမ သုံးဦးအနက် အကြီးဆုံးဖြစ်ပြီး သူ့အောက်တွင်  အသက် ၆ နှစ်နှင့် ၇ နှစ်ငယ်သည့် ညီမနှစ်ဦး ရှိပါသေး သည်။